అంతర్రాష్ట్ర యువజన సమ్మేళనం లో కిట్స్ విద్యార్థులు

KITS వరంగల్ ఎన్‌ఎస్ఎస్ వాలంటీర్లు అంతర్రాష్ట్ర యువజన సమ్మేళనం లో

(తెలుగు వార్త)
వరంగల్‌లోని Kakatiya Institute of Technology and Science (KITSW) ఎన్‌ఎస్ఎస్ విభాగం ఆధ్వర్యంలో విద్యార్థులు కేంద్ర యువజన వ్యవహారాలు, క్రీడల మంత్రిత్వ శాఖ ఆధ్వర్యంలో నిర్వహించిన ‘మై భారత్’ కార్యక్రమం కింద జరిగిన అంతర్రాష్ట్ర యువజన సమ్మేళనం లో పాల్గొన్నారు.

జాతీయ ఐక్యత, సాంస్కృతిక పరస్పర అవగాహన, నాయకత్వ వికాసం లక్ష్యంగా ఈ కార్యక్రమం నిర్వహించినట్లు ప్రిన్సిపాల్ ప్రొఫెసర్ కె. అశోక రెడ్డి తెలిపారు.

తెలంగాణ రాష్ట్ర ప్రతినిధులుగా కిట్స్ వరంగల్ ఎన్‌ఎస్ఎస్ వాలంటీర్లు కేరళ మరియు కర్ణాటక రాష్ట్రాల్లో పాల్గొన్నారు.

కేరళ బృందం
ఫిబ్రవరి 9 నుండి 13 వరకు ఐదు రోజులపాటు కేరళలో నిర్వహించిన కార్యక్రమంలో ఎన్. శివ దీపక్ (ఫైనల్ ఇయర్ సీఎస్ఓ), వై. రోషిణి (ఫైనల్ ఇయర్ సిఎస్ఇ), ఎస్. చేతన (సెకండ్ ఇయర్ సిఎస్ఎం) పాల్గొన్నారు. ఈ సందర్భంగా విద్యార్థులు స్థానిక యువతతో పరస్పర చర్చలు, సామాజిక సేవా కార్యక్రమాలు, నాయకత్వ శిక్షణా సమావేశాల్లో పాల్గొన్నారు.

వీరు Sree Padmanabhaswamy Templeను సందర్శించారు. అలాగే నెయ్యార్ డ్యామ్‌ను సందర్శించి, కేరళకు చెందిన సంప్రదాయ యుద్ధ కళ ‘కళరిపయట్టు’ గురించి అవగాహన పొందారు.

కర్ణాటక బృందం
ఫిబ్రవరి 12 నుండి 16 వరకు కర్ణాటక రాష్ట్రంలోని దక్షిణ కన్నడ జిల్లాలో జరిగిన కార్యక్రమంలో వి. వికాస్ (ఫైనల్ ఇయర్ సిఎస్ఇ), ఆర్. వత్సల్య (ఫైనల్ ఇయర్ సీఎస్ఓ) పాల్గొన్నారు. గ్రామీణ అవగాహన కార్యక్రమాలు, నాయకత్వ శిక్షణ, సాంస్కృతిక పరస్పర చర్చల్లో పాల్గొన్నారు.
ఈ సందర్భంగా వారు ‘భూత కోల’ సంప్రదాయ ఆచారాన్ని, ‘యక్షగాన’ ప్రదర్శనను వీక్షించారు. అలాగే మంగళూరులోని Kudroli Gokarnanatheshwara Temple మరియు న్యూ మంగళూరు సముద్ర తీర పోర్టును సందర్శించారు.

తెలంగాణ సంస్కృతి ప్రదర్శన
రెండు బృందాలు తెలంగాణ రాష్ట్ర సంప్రదాయ పండుగలైన బోనాలు, బతుకమ్మల గురించి వివరణ ఇచ్చి సాంస్కృతిక ప్రదర్శనలు నిర్వహించాయి. పండుగల ప్రాముఖ్యత, ఆచారాలు, సామాజిక విలువలను ఇతర రాష్ట్రాల ప్రతినిధులతో పంచుకున్నారు.

ఈ కార్యక్రమంలో డీన్ స్టూడెంట్ అఫైర్స్ ప్రొఫెసర్ డా. కె. శ్రీధర్, సిఎస్ఇ విభాగాధిపతి డా. పి. నిరంజన్, సిఎస్ఎన్ విభాగాధిపతి డా. వి. శంకర్, సిఎస్ఎం విభాగాధిపతి డా. ఎస్. నర్సింహ రెడ్డి, ఎన్‌ఎస్ఎస్ ప్రోగ్రామ్ ఆఫీసర్ డా. చి. సతీష్ చంద్ర, కో-ప్రోగ్రామ్ ఆఫీసర్ సంతోష్ భార్గవి తదితరులు విద్యార్థులను అభినందించారు. జాతీయ స్థాయిలో సాంస్కృతిక విభాగంలో ప్రశంసలు అందుకోవడం పట్ల కళాశాల అధికారులు సంతోషం వ్యక్తం చేశారు.