కృత్రిమ మేధస్సు పై సెంటిల్ ఇండియా కిట్స్ వరంగల్–ఒప్పందం

వరంగల్, సెప్టెంబర్ 9: కృత్రిమ మేధస్సు (AI) ఆవిష్కరణలు, ప్రాక్టికల్ లెర్నింగ్, విద్యార్థుల నైపుణ్యాభివృద్ధికి సంబంధించి కిట్స్ వరంగల్, హైదరాబాద్‌కు చెందిన సెంటిల్ ఇండియా సంస్థ మధ్య సెప్టెంబర్ 9న అవగాహన ఒప్పందం (MoU) కుదిరింది.
కిట్స్ వరంగల్ క్యాంపస్‌లోని కమిటీ హాల్‌లో జరిగిన కార్యక్రమంలో కిట్స్ వరంగల్ కంప్యూటర్ సైన్స్ అండ్ ఇంజినీరింగ్ (AI & ML) విభాగం, సెంటిల్ ఇండియా ప్రతినిధులు ఈ ఒప్పందంపై సంతకాలు చేశారు.
కిట్స్ వరంగల్ అదనపు కార్యదర్శి, హుస్నాబాద్ మాజీ ఎమ్మెల్యే వి. సతీష్ కుమార్ మాట్లాడుతూ.. ఈ భాగస్వామ్యంలో భాగంగా AI ఆధారిత ఫ్రేమ్‌వర్క్‌తో పాటు విద్యార్థుల అభివృద్ధికి సంబంధించిన ప్రత్యేక ఫ్రేమ్‌వర్క్‌ను రూపొందించనున్నట్లు తెలిపారు. విద్యార్థులకు ఆధునిక సాంకేతిక పరిజ్ఞానంపై అవగాహన కల్పించడం, పరిశ్రమల్లో అవసరమైన నైపుణ్యాలను పెంపొందించడం, ఆవిష్కరణలు మరియు స్టార్టప్ ఆలోచనలను ప్రోత్సహించడం ఈ కార్యక్రమం ఉద్దేశమని చెప్పారు.
కిట్స్ వరంగల్‌కు అనుబంధంగా ఉన్న మాజీ రాజ్యసభ సభ్యుడు కెప్టెన్ వి. లక్ష్మీకాంత రావు, ట్రెజరర్ పి. నారాయణరెడ్డి తదితరులు కార్యక్రమంలో పాల్గొన్నారు.
సెంటిల్ ఇండియా సహ వ్యవస్థాపకుడు జి. సాయి కృష్ణ మాట్లాడుతూ.. విద్యార్థులకు ప్రాక్టికల్ లెర్నింగ్, మెంటరింగ్, పరిశ్రమ ఆధారిత శిక్షణ ద్వారా కొత్త సాంకేతికతలను నేర్చుకునే అవకాశాలను కల్పించనున్నట్లు తెలిపారు.
IIM రాంచీ పూర్వ విద్యార్థి గుగులోతు వంశీ, IIT కలకత్తా పూర్వ విద్యార్థి గుగులోతు సాయి కలిసి సెంటిల్ ఇండియాను స్థాపించారు. విద్యార్థుల్లో సాంకేతిక నైపుణ్యాలు, స్టార్టప్ సంస్కృతిని పెంపొందించడంపై సంస్థ దృష్టి సారిస్తోంది.
ఈ ఒప్పందంలో భాగంగా ట్రైసిటీ AI హ్యాకథాన్ అక్టోబర్ 10, 11 తేదీల్లో నిర్వహించనున్నారు. వరంగల్, హనుమకొండ, కాజీపేట ప్రాంతాల నుంచి 1,000 మందికి పైగా విద్యార్థులు పాల్గొనే అవకాశం ఉంది. రెండు రోజుల పాటు జరిగే ఈ కార్యక్రమంలో ఆర్టిఫిషియల్ ఇంటెలిజెన్స్, జనరేటివ్ AI, ఏజెంటిక్ AI అంశాలపై విద్యార్థులు పనిచేయనున్నారు. వాస్తవ సమస్యలకు పరిష్కారాలు రూపొందించడం, పరిశ్రమ నిపుణులు, మెంటర్లతో చర్చించడం, తమ ప్రోటోటైప్స్, ఆలోచనలను ప్రదర్శించడం వంటి కార్యక్రమాలు ఉంటాయి.
కిట్స్ వరంగల్ ప్రిన్సిపాల్ ప్రొఫెసర్ అశోక్ రెడ్డి మాట్లాడుతూ.. ఈ కార్యక్రమం ద్వారా పరిశ్రమలు, విద్యాసంస్థల మధ్య అనుసంధానం మరింత బలోపేతం అవుతుందని తెలిపారు. విద్యార్థులు, అధ్యాపకులు పరిశ్రమ నిపుణులు, మెంటర్లతో కలిసి వాస్తవ సమస్యలపై పనిచేసే అవకాశం ఉంటుందని చెప్పారు.
కార్యక్రమంలో రిజిస్ట్రార్ కోమల్ రెడ్డి, అడ్మినిస్ట్రేటివ్ ఆఫీసర్ రమేష్ రెడ్డి, CSE (AI & ML) విభాగాధిపతి డాక్టర్ ఎ. జ్యోతి ప్రభ, IIIC ప్రొఫెసర్ ఇన్‌చార్జ్ ప్రొఫెసర్ ఎం. వీరారెడ్డి, అసోసియేట్ ప్రొఫెసర్, PRO డాక్టర్ డి. ప్రభాకర చారి, I3C ఫ్యాకల్టీ ఇన్‌చార్జ్ డాక్టర్ జి. సునీల్ కుమార్, సీనియర్ అధ్యాపకులు డాక్టర్ వినయ్ కుమార్, డాక్టర్ బి. హనుమంతు, డాక్టర్ ఎం. రాజేష్ తదితరులు పాల్గొన్నారు.