బెంగళూరులో నిర్వహించిన ది హిందూ హడిల్-2026 చర్చాగోష్టిలో తెలంగాణ ముఖ్యమంత్రి Revanth Reddy పాల్గొని రాష్ట్ర అభివృద్ధి, ఉపాధి, వ్యవసాయం, మహిళా సాధికారత, భవిష్యత్ ప్రణాళికలపై విస్తృతంగా మాట్లాడారు. మారుతున్న పరిస్థితులకు అనుగుణంగా యువత కొత్త అవకాశాలపై దృష్టి పెట్టాలని ఆయన సూచించారు.
ఏఐ ప్రభావంతో వైట్ కాలర్ ఉద్యోగాలపై ఆందోళనలు పెరుగుతున్నాయని పేర్కొన్న సీఎం, వాటికి ప్రత్యామ్నాయంగా బ్లూ కాలర్ ఉద్యోగాల్లో మంచి అవకాశాలు ఉన్నాయని చెప్పారు. యువత ఆయా రంగాల్లో నైపుణ్యాలు పెంచుకుంటే అవకాశాలను అందిపుచ్చుకోవచ్చని అన్నారు. ఇందుకోసం తెలంగాణ ప్రభుత్వం యంగ్ ఇండియా స్కిల్స్ యూనివర్సిటీ ఏర్పాటు చేయడంతో పాటు పాత ఐటీఐలను ఆధునిక టెక్నాలజీ సెంటర్లుగా అప్గ్రేడ్ చేసినట్లు తెలిపారు.
రాష్ట్ర సమగ్రాభివృద్ధి కోసం రూపొందించిన “తెలంగాణ రైజింగ్-2047” ప్రణాళికపై కూడా సీఎం వివరించారు. తెలంగాణను 3 ట్రిలియన్ డాలర్ల ఆర్థిక శక్తిగా తీర్చిదిద్దే లక్ష్యంతో ముందుకు వెళ్తున్నామని చెప్పారు. రైతులు, యువత, మహిళల అభ్యున్నతికి ప్రభుత్వం పలు సంక్షేమ కార్యక్రమాలు అమలు చేస్తోందని తెలిపారు.
టీజీపీఎస్సీ వ్యవస్థను సంస్కరించి పారదర్శక నియామక ప్రక్రియను అమలు చేశామని సీఎం వెల్లడించారు. యూపీఎస్సీ విధానాలను అధ్యయనం చేసి వాటిని టీజీపీఎస్సీలో అమలు చేసిన తర్వాత 15 నెలల్లో 67,760 ఉద్యోగాలు భర్తీ చేశామని చెప్పారు. దేశంలోనే అత్యధికంగా ఉద్యోగ నియామకాలు చేపట్టిన రాష్ట్రంగా తెలంగాణ నిలిచిందని పేర్కొన్నారు. త్వరలో మరో 5 వేల పోలీసు ఉద్యోగాల నోటిఫికేషన్ విడుదల చేయనున్నట్లు తెలిపారు.
రైతుల ఆత్మహత్యలకు అప్పులే ప్రధాన కారణమని సీఎం అన్నారు. అధికారంలోకి వచ్చిన తర్వాత 25,035 రైతు కుటుంబాలకు చెందిన రూ.20,616 కోట్ల రుణాలను మాఫీ చేశామని తెలిపారు. 2024-25 సంవత్సరంలో రైతు ఆత్మహత్యలు లేని రాష్ట్రంగా తెలంగాణ నిలిచిందని ఎన్సీఆర్బీ నివేదిక వెల్లడించిందని చెప్పారు. ధాన్యం రైతులకు క్వింటాల్కు రూ.500 బోనస్ ఇస్తున్నామని, రైతు భరోసా కింద ఎకరాకు రూ.12 వేల ఆర్థిక సహాయం అందిస్తున్నామని తెలిపారు.
మహిళా సాధికారత కోసం స్వయం సహాయక సంఘాలకు సున్నా వడ్డీ రుణాలు అందిస్తున్నామని సీఎం వివరించారు. రాష్ట్రంలోని 67 లక్షల మహిళలు రూ.60 వేల కోట్ల రుణాలు తీసుకున్నారని, వాటి వడ్డీని ప్రభుత్వం భరిస్తోందని తెలిపారు. మహిళా సంఘాలు బస్సులు కొనుగోలు చేయడంతో పాటు సోలార్ ప్లాంట్లు, పెట్రోల్ బంకులు నిర్వహిస్తున్నాయని చెప్పారు. ప్రభుత్వ పాఠశాలల్లో వసతుల నిర్వహణ బాధ్యతలను కూడా మహిళా సంఘాలకు అప్పగించామని పేర్కొన్నారు.
తెలంగాణ అభివృద్ధి కోసం ప్రత్యేక ప్రణాళికతో ముందుకు వెళ్తున్నామని సీఎం తెలిపారు. హైదరాబాద్ ఔటర్ రింగ్ రోడ్ పరిధిని క్యూర్, ప్యూర్, రేర్ జోన్లుగా విభజించి ఆయా ప్రాంతాల అవసరాలకు అనుగుణంగా అభివృద్ధి ప్రణాళికలు అమలు చేస్తున్నామని చెప్పారు. క్యూర్ ప్రాంతాన్ని నెట్ జీరో సిటీగా తీర్చిదిద్దే లక్ష్యంతో ఈవీ వాహనాలకు ప్రోత్సాహం ఇస్తున్నామని, మెట్రో విస్తరణ పనులు కొనసాగుతున్నాయని వెల్లడించారు.
హైదరాబాద్లో చెరువుల ఆక్రమణలను తొలగించి పునరుద్ధరణ చర్యలు చేపడుతున్నామని సీఎం తెలిపారు. ప్యూర్ ప్రాంతంలో తయారీ రంగాన్ని ప్రోత్సహిస్తూ 30 వేల ఎకరాల్లో భారత్ ఫ్యూచర్ సిటీ నిర్మిస్తున్నామని చెప్పారు. ఫార్చూన్-500 కంపెనీలు పెట్టుబడులు పెట్టేలా చర్యలు తీసుకుంటున్నామని పేర్కొన్నారు.
పొరుగు రాష్ట్రాలతో కాకుండా చైనా, జపాన్, దక్షిణ కొరియా, జర్మనీ వంటి దేశాలతో పోటీ పడే లక్ష్యంతో తెలంగాణ ముందుకు వెళ్తోందని సీఎం అన్నారు. చైనా+1 పెట్టుబడి అవకాశాల్లో తెలంగాణ ప్రధాన గమ్యస్థానంగా నిలిచేలా కృషి చేస్తున్నామని తెలిపారు.
పరిపాలనలో కామన్ సెన్స్ ఎంతో ముఖ్యమని సీఎం వ్యాఖ్యానించారు. ప్రజల సమస్యలను అర్థం చేసుకోవడానికి ఎవరితోనైనా నేర్చుకోవడానికి సిద్ధంగా ఉంటానని చెప్పారు. రైతులు, యువత, మహిళల సమస్యలను దగ్గరగా చూసిన అనుభవమే తన పాలనకు బలం అని పేర్కొన్నారు.
తాను వ్యవసాయ కుటుంబం నుంచి వచ్చానని, ఎలాంటి రాజకీయ నేపథ్యం లేకుండా ప్రజల ఆశీర్వాదంతో ఈ స్థాయికి చేరుకున్నానని సీఎం రేవంత్ రెడ్డి తెలిపారు.
