విశాఖ కళాభారతికి అక్షరహారతి

కళాభారతికి అక్షరహారతి!

(విశాఖ కళాభారతి
వార్షికోత్సవం..)
03.03.1991

అదిగదిగో విశాఖ గర్వకారణం..
రెండస్తుల కళాతోరణం..
మహానగరానికి చక్కగా
అమరిన కంఠాభరణం..
విశాఖ ఉక్కుకు సరితూగే
“శంకర”సంకల్పబలం..
సాగరనగరానికే శంకరాభరణం..
ఉక్కునగర..
సాంస్కృతిక హారతి..
కళాభారతి..!

ఒక మనిషి కల..
సాధించి చూపిన ఆయన కళ
వైజాగ్ పట్నానికి
కళకళ..
ఆ ప్రాంగణంతో
ప్రతి కళాకారుని
మోము తళతళ..!

పిఠాపురం కాలనీలో
సమున్నత కళా శిఖరం..
పెద్దాయన శంకరశాస్త్రి
గొప్ప కరం..
విశ్రాంత ప్రధానోపాధ్యాయుని
మదిలో పుట్టిన ఆలోచన..
రవీంద్రభారతికి ధీటుగా
కళాభారతి..
శంకరశాస్త్రి నిరతి..
రూపాయి రూపాయి పోగేసిన
ఆయన దీక్ష..
ద్వారకానగరం నుంచి
విశ్వవిద్యాలయం వరకు
అలుపెరుగని నడక..
తీసుకున్న ప్రతి రూకకి
రసీదిచ్చిన నిబద్ధత..
మహా సౌధానికి అంకురార్పణ..
విశాఖ నగరానికి
శంకరశాస్త్రి సవినయ సమర్పణ..!

రూపాయి రూపాయి
సమకూరినట్టే..
మనిషికి మనిషి తోడై..
మొదలైంది నిర్మాణ యజ్ఞం..
ఇంజనీరు సి ఎస్ ఎన్ రాజు
నేను సైతం అంటే..
ఏ పని చేపట్టినా ముందుండే
డి వి సుబ్బారావు చేరికతో
మునుముందుకే అడుగుకు..
ఇలాంటి పనికి దిగితే..
ఊరికే ఉంటారా ఆయన..
ఊరినే చేర్చెయ్యరూ..
భాట్టం దృష్టి పడడం
మరో ఘట్టం..
శంకరం సేకరించిన
ఎనిమిది లకారాలకు
సాంస్కృతిక శాఖ మంత్రిగా
ఆయన సమకూర్చారు
ఇంకో రెండు లకారాలు..
ఇంకేమి కళాభారతికి
వచ్చింది ఆకారం..
జోగారావు..
ఎల్లెస్సార్ శాస్త్రి..
ఇత్యాదుల సహకారంతో
సిద్ధమైంది ప్రాకారం..
కళాభారతి..
నేమాని కృష్ణమూర్తి చిత్రాలతో
మరిన్ని సొగసులు అద్దుకుని
విశాఖ తలమానికంగా..
మహానగర విస్తృత అభివృద్ధికి
శుభసూచకంగా..!

సురేష్ కుమార్ ఎలిశెట్టి
9948546286
7995666286