హైదరాబాద్, మే 18, 2025: హైదరాబాద్ ఓల్డ్ సిటీలోని గుల్జార్ హౌస్ సమీపంలో ఆదివారం తెల్లవారుజామున జరిగిన ఘోర అగ్నిప్రమాద మృతుల కుటుంబాలకు కేంద్ర,రాష్ర్ట ప్రభుత్వాలుఎక్స్ గ్రేషియా ప్రకటించాయ. ఈ దుర్ఘటనలో 17 మంది చనిపోగా అనేక మంది గాయపడ్డారు. ప్రాథమిక దర్యాప్తులో షార్ట్ సర్క్యూట్ కారణంగా అగ్నిప్రమాదం సంభవించినట్లు తెలంగాణ రాష్ట్ర విపత్తు స్పందన మరియు అగ్నిమాపక సర్వీసెస్ డైరెక్టర్ జనరల్ వై. నాగి రెడ్డి తెలిపారు. మృతులందరూ పొగ ఆస్ఫిక్షియా (స్మోక్ ఇన్హలేషన్) కారణంగా మరణించినట్లు ఆయన వెల్లడించారు.
ఈ ఘటన జరిగిన భవనంలో ఒకే కుటుంబానికి చెందిన 17 మంది సభ్యులు ఉన్నారని, వారిలో కేవలం ఇద్దరు మాత్రమే బయటపడ్డారని ఆల్ ఇండియా మజ్లిస్-ఎ-ఇత్తెహాదుల్ ముస్లిమీన్ (AIMIM) అధ్యక్షుడు అసదుద్దీన్ ఒవైసీ తెలిపారు. ఈ కుటుంబం గత 125 సంవత్సరాలుగా ఈ ప్రాంతంలో నివసిస్తోందని ఆయన పేర్కొన్నారు. భవనంలో ఒకే ప్రవేశ మార్గం ఇరుకైన మెట్ల మార్గం ఉండటం వల్ల రక్షణ సహాయ కార్యక్రమాలకు ఇబ్బందులు కలిగాయి.
ముఖ్యమంత్రి రేవంత్ రెడ్డి సంతాపం, రూ. 5 లక్షల ఎక్స్‌గ్రేషియా ప్రకటన:
తెలంగాణ ముఖ్యమంత్రి ఎ. రేవంత్ రెడ్డి ఈ విషాద ఘటనపై తీవ్ర దిగ్భ్రాంతి వ్యక్తం చేశారు. మంటల్లో చిక్కుకున్న వారిని కాపాడేందుకు అవసరమైన అన్ని చర్యలు చేపట్టాలని ఉన్నతాధికారులను ఆదేశించారు. గాయపడిన వారిని వెంటనే సమీప ఆసుపత్రులకు తరలించి, ఉత్తమ వైద్య సహాయం అందించాలని ఆదేశాలు జారీ చేశారు. రాష్ట్ర రవాణా మంత్రి పొన్నం ప్రభాకర్, ఆరోగ్య శాఖ మంత్రి దామోదర్ రాజా నరసింహ రక్షణ మరియు సహాయక చర్యలను పర్యవేక్షించారు.
తెలంగాణ ఉప ముఖ్యమంత్రి మల్లు భట్టి విక్రమార్క ఓస్మానియా జనరల్ హాస్పిటల్ మార్చురీ వద్ద మాట్లాడుతూ, మృతుల కుటుంబాలకు రూ. 5 లక్షల ఎక్స్‌గ్రేషియా ప్రకటించారు. ఈ ఘటనను “అత్యంత దురదృష్టకరం” అని వివరిస్తూ, మంత్రిమండలి మొత్తం ఈ విషాదంతో తీవ్ర ఆవేదనలో ఉందని తెలిపారు.
గవర్నర్ సంతాపం
తెలంగాణ గవర్నర్ జిష్ణు దేవ్ వర్మ ఈ అగ్నిప్రమాద ఘటనపై తీవ్ర దుఃఖం వ్యక్తం చేశారు. మృతుల కుటుంబాలకు హృదయపూర్వక సంతాపం తెలిపారు. “ఈ విషాదకర ఘటనలో ప్రాణాలు కోల్పోయిన వారి గురించి తెలిసి హృదయం బరువెక్కిందని అన్నారు.
ప్రధానమంత్రి సంతాపం, ఎక్స్‌గ్రేషియా ప్రకటన
ప్రధానమంత్రి నరేంద్ర మోదీ ఈ ఘటనపై తీవ్ర విచారం వ్యక్తం చేస్తూ, మృతుల కుటుంబాలకు రూ. 2 లక్షలు, గాయపడిన వారికి రూ. 50,000 ఎక్స్‌గ్రేషియాను ప్రధానమంత్రి జాతీయ సహాయ నిధి (PMNRF) నుంచి ప్రకటించారు.
రక్షణ కార్యక్రమాలు
అగ్నిమాపక సర్వీసెస్ డైరెక్టర్ జనరల్ వై. నాగి రెడ్డి పర్యవేక్షణలో అగ్నిమాపక శాఖ అధికారులు ఉదయం 6:16 గంటలకు సమాచారం అందిన వెంటనే 11 ఫైర్ ఇంజన్‌లతో సంఘటనా స్థలానికి చేరుకున్నారు. ఉదయం 9 గంటల నాటికి మంటలు అదుపులోకి వచ్చాయని అధికారులు తెలిపారు. గాయపడిన వారిని వివిధ ఆసుపత్రులకు తరలించారు. రక్షణ కార్యక్రమాల్లో ఒక అగ్నిమాపక సిబ్బంది అస్వస్థతకు గురై ఆసుపత్రిలో చికిత్స పొందుతున్నారు.
ప్రతిపక్ష నాయకుల స్పందన
భారత్ రాష్ట్ర సమితి (BRS) వర్కింగ్ ప్రెసిడెంట్ కె.టి. రామారావు ఈ ఘటనపై తీవ్ర ఆవేదన వ్యక్తం చేస్తూ, మృతుల కుటుంబాలకు సంతాపం తెలిపారు. గాయపడిన వారు త్వరగా కోలుకోవాలని ఆకాంక్షించారు. BRS నాయకుడు టి. హరీష్ రావు ప్రభుత్వ నిర్లక్ష్యాన్ని విమర్శిస్తూ, మృతుల కుటుంబాలకు రూ. 25 లక్షల ఎక్స్‌గ్రేషియా అందించాలని డిమాండ్ చేశారు.
ఈ విషాద ఘటన హైదరాబాద్ నగరంలో అగ్నిప్రమాదాల భద్రతా చర్యలపై అనేక ప్రశ్నలులేవ నెత్తింది. ప్రభుత్వం ఈ ఘటనపై విచారణకు ఆదేశించింది, భవిష్యత్తులో ఇటువంటి ప్రమాదాలను నివారించేందుకు కఠిన చర్యలు తీసుకోవాలని అధికారులను ఆదేశించింది.
