శతాబ్దాల చరిత్ర కలిగిన బ్రిటిష్ పార్లమెంట్ ఎగువసభ House of Lordsలో తెలంగాణ బిడ్డ ఉదయ్ నాగరాజు జీవితకాల సభ్యుడిగా (లైఫ్ పీర్) ప్రమాణ స్వీకారం చేశారు. బ్రిటిష్ సంప్రదాయాల ప్రకారం బుధవారం జరిగిన వేడుకలో ముదురు ఎరుపు గౌను ధరించి, భగవద్గీతపై ప్రమాణం చేసి అందరి దృష్టిని ఆకర్షించారు. తన మూలాలను మరవకుండా భారతీయ సంస్కృతికి గౌరవం తెచ్చారు.
సిద్దిపేట జిల్లా కోహెడ మండలం శనిగరం గ్రామానికి చెందిన నాగరాజు దాదాపు 25 ఏళ్ల క్రితం బ్రిటన్కు వెళ్లి అక్కడే స్థిరపడ్డారు. యువతలో నైతిక నాయకత్వం, సామాజిక న్యాయం, గాంధేయ విలువలను పెంపొందించాలనే లక్ష్యంతో ‘మహాత్మా గాంధీ ఫ్యూచర్ లీడర్స్ ప్రోగ్రామ్’ను స్థాపించారు. అంతేకాదు, ‘ఏఐ పాలసీ ల్యాబ్స్’ సంస్థ ద్వారా కృత్రిమ మేధ (ఏఐ), గ్లోబల్ గవర్నెన్స్ అంశాలపై విశేష కృషి చేస్తున్నారు.
రెండేళ్ల క్రితం బ్రిటన్ పార్లమెంట్ ఎన్నికల్లో నార్త్ బెడ్ఫోర్డ్షైర్ నియోజకవర్గం నుంచి లేబర్ పార్టీ తరఫున పోటీ చేసి స్వల్ప తేడాతో రెండో స్థానంలో నిలిచారు. ఎన్నికల్లో గెలుపు సాధించకపోయినా, ఆయన ప్రజాసేవకు గుర్తింపుగా బ్రిటన్ ప్రధాని Keir Starmer సిఫార్సు మేరకు, రాజు Charles III ఆయనను ఎగువ సభ సభ్యునిగా ఎంపిక చేశారు.
ఇకపై ఆయనను ‘లార్డ్ నాగరాజు ఆఫ్ బ్లూమ్స్బరీ’గా పిలుస్తారు. తన పేరుకు ‘బ్లూమ్స్బరీ’ను జోడించడంలో ప్రత్యేక కారణం ఉంది. లండన్లోని ప్రముఖ విద్యాసంస్థ University College London ఈ ప్రాంతంలోనే ఉంది. మహాత్మా గాంధీ చదివిన ఈ విద్యాసంస్థలోనే నాగరాజు పబ్లిక్ అడ్మినిస్ట్రేషన్లో మాస్టర్స్ డిగ్రీ పూర్తి చేశారు.
తెలంగాణ పల్లె నుంచి బయలుదేరిన ఒక యువకుడు బ్రిటిష్ పార్లమెంట్ ఎగువసభలో స్థానం సంపాదించడం రాష్ట్రానికి గర్వకారణంగా మారింది. ప్రపంచ వేదికపై భారతీయ విలువలు ప్రతిధ్వనించేలా కృషి చేస్తానని నాగరాజు ఈ సందర్భంగా తెలిపారు.