SIRలో నోటీసులు, విచారణలు, క్లెయిమ్‌లు, అభ్యంతరాలపై ఎన్నికల సంఘం మార్గదర్శకాలు

న్యూఢిల్లీ, అక్టోబర్ 1: ఓటర్ల జాబితా ప్రత్యేక సమగ్ర సవరణ (SIR) సందర్భంగా నోటీసులు, విచారణలు, క్లెయిమ్‌లు, అభ్యంతరాల పరిష్కారంపై ఎన్నికల సంఘం పలు మార్గదర్శకాలను జారీ చేసింది.
ఏదైనా ఓటరుకు నోటీసు జారీ అయితే సంబంధిత బూత్ లెవల్ అధికారి (BLO) ఆ ఓటరు ఇంటికి వెళ్లి అవసరమైన పత్రాలను సేకరించి, ECI నెట్‌లో అప్‌లోడ్ చేయాలి. అనంతరం ఎలక్టోరల్ రిజిస్ట్రేషన్ అధికారి (ERO) లేదా అసిస్టెంట్ ఎలక్టోరల్ రిజిస్ట్రేషన్ అధికారి (AERO) వాటిని పరిశీలించి నిర్ణయం తీసుకుంటారు.
నోటీసు అందుకున్న ప్రతి ఓటరును ERO/AERO కార్యాలయానికి విచారణకు పిలవాల్సిన అవసరం లేదని ఎన్నికల సంఘం స్పష్టం చేసింది. ERO/AERO నిర్ణయించిన మేరకు అత్యవసర లేదా ప్రత్యేక పరిస్థితుల్లో మాత్రమే విచారణ నిర్వహించాలి. వీలైనంత వరకు అందుబాటులో ఉన్న కమ్యూనికేషన్ మార్గాల ద్వారా ఆన్‌లైన్‌లో విచారణ నిర్వహించాలని సూచించింది. ఇందుకు సంబంధించిన సాఫ్ట్‌వేర్‌ను అప్‌డేట్ చేసి అందుబాటులోకి తీసుకొచ్చారు.
ఓటరు స్వయంగా విచారణకు హాజరు కాలేని పరిస్థితిలో, కుటుంబంలోని ఏదైనా వయోజన సభ్యుడిని తన తరఫున హాజరయ్యేందుకు అధీకృతం చేయవచ్చు.
అవసరమైన పత్రాలు లేని నిజమైన, నిర్దోషి ఓటర్ల విషయంలో EROలు స్థానికంగా విచారణ జరిపి నిర్ణయం తీసుకోవాలని సూచించారు. రాత్రి ఆశ్రయ కేంద్రాల్లో ఉండేవారు, కార్మికులు, పేదలు, నిరాశ్రయులు తదితర ఓటర్ల సౌకర్యం కోసం అవసరమైన మేరకు హెల్ప్‌డెస్క్‌లు ఏర్పాటు చేయాలని, ప్రత్యేక శిబిరాలు నిర్వహించాలని సూచించారు.
ఫారం-6తో జత చేసిన డిక్లరేషన్ ఫారాన్ని SIR కాలంలో మాత్రమే ఉపయోగించాలని ఎన్నికల సంఘం స్పష్టం చేసింది. SIR కాని సమయంలో డిక్లరేషన్ ఫారాన్ని తప్పనిసరిగా సమర్పించాలని కోరరాదు.
ఓటరు అనర్హుడని ERO/AERO నిర్ధారించిన కేసుల్లో మాత్రమే కారణాలను వివరించే ఉత్తర్వులు (Speaking Orders) జారీ చేయాలి. పెద్ద సంఖ్యలో అందే ఫారం-7 దరఖాస్తుల విషయంలో ప్రత్యేక జాగ్రత్తలు తీసుకోవాలని సూచించింది.
జారీ చేసిన నోటీసుల పరిష్కార స్థితిని ERO కార్యాలయాల నోటీసు బోర్డులపై ప్రతిరోజూ ప్రదర్శించాలి. ఈ వివరాలను రాజకీయ పార్టీలకు, మీడియాకు కూడా అందించాలి.
ఫారం-9, 10, 11, 11A, 11B ద్వారా అందిన క్లెయిమ్‌లు, అభ్యంతరాల జాబితాలను ప్రతి పని దినం నోటీసు బోర్డులపై ప్రదర్శించాలి.
అన్ని క్లెయిమ్‌లు, అభ్యంతరాలను చీఫ్ ఎలక్టోరల్ ఆఫీసర్ (CEO) వెబ్‌సైట్‌లో కూడా అందుబాటులో ఉంచాలి. దీంతో ప్రజలు జాబితాలను పరిశీలించి, అవసరమైతే అభ్యంతరాలు నమోదు చేసుకునే అవకాశం ఉంటుంది.