ట్యాంక్‌బండ్‌పై పాపన్న గౌడ్ విగ్రహానికి ప్రత్యేక ప్రాధాన్యత

హైదరాబాద్: తెలంగాణ బహుజనుల తెలంగాణ అని, సామాజిక న్యాయం, స్వేచ్ఛతో జీవించే అవకాశం ఇందిరమ్మ పాలనలో ఉందని ముఖ్యమంత్రి రేవంత్ రెడ్డి అన్నారు. సర్దార్ సర్వాయి పాపన్న గౌడ్ విగ్రహావిష్కరణ సభలో ఆయన మాట్లాడుతూ పాపన్న గౌడ్ స్ఫూర్తి తెలంగాణ ప్రజలకు ఎప్పటికీ మార్గదర్శకంగా నిలవాలని పేర్కొన్నారు.

సర్దార్ సర్వాయి పాపన్న గౌడ్ విగ్రహాన్ని ఏర్పాటు చేసి ఆయన స్ఫూర్తిని ప్రజల్లో విస్తరించాలని గౌడ సోదరులు చాలా కాలంగా కోరుతున్నారని సీఎం చెప్పారు. ముఖ్యమంత్రి హోదాలో నెక్లెస్ రోడ్డును పరిశీలించి అక్కడ జ్యోతిరావు ఫూలే, సావిత్రిబాయి ఫూలే విగ్రహాల ఏర్పాటుకు సూచనలు ఇచ్చినట్లు తెలిపారు. ట్యాంక్‌బండ్‌పై ఉన్న పర్యాటక కార్యాలయాన్ని తొలగించి సర్దార్ సర్వాయి పాపన్న గౌడ్ విగ్రహాన్ని ఏర్పాటు చేయాలని నిర్ణయించినట్లు చెప్పారు.

ట్యాంక్‌బండ్‌కు వచ్చే పర్యాటకులు, సందర్శకులు పాపన్న గౌడ్ విగ్రహాన్ని చూసి ఆయన పోరాట స్ఫూర్తిని తెలుసుకోవాలనే ఉద్దేశంతో ఈ ఏర్పాటు చేసినట్లు వివరించారు. బహుజనుల నుంచి పుట్టుకొచ్చిన పాపన్న గౌడ్ తన కుటుంబం లేదా కులం కోసమే కాకుండా బహుజనుల కోసం పోరాడారని అన్నారు. బహుజనులతో కలిసి దండయాత్ర చేసి గోల్కొండ కోటపై జెండా ఎగురవేశారని గుర్తు చేశారు.

మహారాష్ట్రలో శివాజీ విగ్రహానికి ఉన్న ప్రాధాన్యత మాదిరిగానే తెలంగాణలో సర్దార్ సర్వాయి పాపన్న గౌడ్ విగ్రహానికి బహుజనులు ప్రాధాన్యత ఇస్తారని సీఎం పేర్కొన్నారు. బ్రిటిష్ లైబ్రరీలో పాపన్న గౌడ్‌కు సంబంధించిన వివరాలు ఉన్నాయని, అక్కడి ఆధారాల ద్వారానే ఆయన చరిత్రను మరింతగా తెలుసుకున్నామని తెలిపారు. బహుజనుల కోసం జీవితాన్ని అంకితం చేసినందుకే వందల ఏళ్లు గడిచినా ఆయనను ప్రజలు గుర్తు చేసుకుంటున్నారని అన్నారు.

ఈ విగ్రహాన్ని కాపాడుకోవాల్సిన బాధ్యత గౌడ సోదరులపై ఉందని, నిత్యం ప్రజల్లో స్ఫూర్తిని నింపేలా దీనిని సంరక్షించాలని కోరారు. విగ్రహం వద్ద మెరుగైన వెలుగులు, ఇతర అవసరమైన సౌకర్యాలు ఏర్పాటు చేయాలని అధికారులను ఆదేశించినట్లు తెలిపారు. తెలంగాణ అమరవీరుల స్థూపం స్థాయిలోనే పాపన్న గౌడ్ విగ్రహానికి ప్రాధాన్యత ఉంటుందని చెప్పారు.

పండుగ సాయన్న జయంతి అధికారిక నిర్వహణ

పాలమూరు ప్రాంతంలో పండుగ సాయన్న పోరాటం, పౌరుషం అందరికీ తెలిసిన విషయమేనని సీఎం రేవంత్ రెడ్డి అన్నారు. ప్రతి సంవత్సరం అక్టోబర్ 22న పండుగ సాయన్న జయంతిని ప్రభుత్వం అధికారికంగా నిర్వహిస్తుందని ప్రకటించారు.

ఈ ప్రభుత్వం ఒక్కరి ప్రభుత్వం కాదని, సామాజిక న్యాయం, సంక్షేమం కోసం పనిచేస్తున్న అందరి ప్రభుత్వమని చెప్పారు. కాంగ్రెస్ పార్టీలో బాలా గౌడ్, మల్లికార్జున్ గౌడ్ వంటి నాయకులు ఎదిగారని పేర్కొన్నారు. పీసీసీ అధ్యక్షుడు మహేష్ గౌడ్ నాయకత్వంలో పార్టీని మరోసారి అధికారంలోకి తీసుకురావడానికి గౌడ సోదరులు పూర్తి సహకారం అందించాలని కోరారు.

గీత కార్మికుల సంక్షేమానికి చర్యలు

గీత కార్మికుల వృత్తిని కాపాడే బాధ్యత ప్రభుత్వానిదేనని సీఎం తెలిపారు. అర్హులైన నేత, గీత కార్మికులందరికీ పింఛన్లు అందించాలని ఇప్పటికే ఆదేశాలు ఇచ్చినట్లు చెప్పారు. ప్రభుత్వ భూముల్లో ఈత, తాటి చెట్లు నాటడంతో పాటు కాలువ గట్లపై కూడా ఈత, తాటి మొక్కలు పెంచేందుకు చర్యలు తీసుకుంటామని అన్నారు.

గౌడ సోదరులకు 50 వేల కాటమయ్య కిట్లను పంపిణీ చేశామని, ప్రమాదవశాత్తు గీత కార్మికులు మరణిస్తే రూ.5 లక్షల పరిహారం అందిస్తున్నామని తెలిపారు.

కులవృత్తితో పాటు పిల్లలకు విద్య అవసరం

తరతరాలుగా కొనసాగుతున్న కులవృత్తులను గౌరవించాలని, వాటిని కొనసాగిస్తూనే పిల్లలకు నాణ్యమైన విద్య అందించాలని సీఎం పిలుపునిచ్చారు. గతంలో కులవృత్తులకే పరిమితం కావాలన్న ఆలోచనలు ఉన్నాయని, అయితే ఆ వర్గాల పిల్లలు చదివి వైద్యులు, న్యాయవాదులు, ఐఏఎస్‌లుగా ఎదిగి తెలంగాణ అభివృద్ధిలో భాగస్వాములు కావాలని తాను ఎప్పటి నుంచో చెబుతున్నానని అన్నారు.

“పిల్లల తలరాతను మార్చేది చదువే” అని పేర్కొన్నారు. కష్టమైనా, నష్టమైనా పిల్లలను బడికి పంపించాలని, వారి చదువు బాధ్యతను ప్రభుత్వం తీసుకుంటుందని తెలిపారు. విద్యార్థుల కోసం అవసరమైనన్ని నిధులు కేటాయిస్తామని చెప్పారు.

ప్రభుత్వ పాఠశాలలు, సంక్షేమ వసతి గృహాల్లో నాణ్యమైన భోజనం అందిస్తున్నామని, సన్నబియ్యంతో భోజనంతో పాటు అల్పాహారం, పాలు, రాగిజావ అందిస్తున్నామని తెలిపారు. ఏటీసీల్లో చేరిన వారికి నెలకు రూ.2 వేల ఉపకార వేతనం ఇస్తున్నట్లు చెప్పారు.

బీసీ కులగణన, ఎస్సీ వర్గీకరణ అమలు చేశాం

తమ ప్రభుత్వం బీసీ కులగణన నిర్వహించిందని, ఎస్సీ వర్గీకరణ అమలు చేసిందని సీఎం అన్నారు. గత ప్రభుత్వంపై విమర్శలు చేస్తూ, పదేళ్ల పాలనలో జరిగిన అప్పుల భారం ప్రస్తుతం ప్రభుత్వంపై ప్రభావం చూపుతోందని పేర్కొన్నారు. రూ.8 లక్షల 11 వేల కోట్ల అప్పు భారంగా మారిందని, ఏడాదికి రూ.75 వేల కోట్ల వరకు వడ్డీ చెల్లించాల్సి వస్తోందని చెప్పారు.

అయినప్పటికీ రైతు భరోసా కింద రూ.36 వేల కోట్లు అందించామని, రూ.95 వేల కోట్లతో ధాన్యం కొనుగోలు చేశామని తెలిపారు. మహిళా సంఘాలకు రూ.60 వేల కోట్ల బ్యాంకు అనుసంధాన రుణాలు ఇచ్చామని పేర్కొన్నారు.

ప్రతి నియోజకవర్గంలో రూ.200 కోట్లతో యంగ్ ఇండియా సమగ్ర పాఠశాలలను ఏర్పాటు చేస్తున్నామని చెప్పారు. యంగ్ ఇండియా క్రీడా విశ్వవిద్యాలయం, క్రీడా అకాడమీని కూడా ప్రారంభించామని తెలిపారు.

కుటుంబ న్యాయం కాదు.. సామాజిక న్యాయం

తన పాలన సామాజిక న్యాయం ఆధారంగా సాగుతోందని సీఎం రేవంత్ రెడ్డి అన్నారు. కాంగ్రెస్ పార్టీలో పీసీసీ అధ్యక్షుడిగా మహేష్ గౌడ్‌ను నియమించామని, పలువురు బీసీ, బహుజన వర్గాలకు చెందిన నాయకులకు మంత్రివర్గం, ఇతర కీలక పదవుల్లో అవకాశం కల్పించామని చెప్పారు.

వీరనారి చాకలి ఐలమ్మ మనుమరాలిని తెలంగాణ రాష్ట్ర మహిళా కమిషన్ సభ్యురాలిగా, శ్రీకాంతాచారి తల్లి శంకరమ్మను కూడా మహిళా కమిషన్ సభ్యురాలిగా నియమించిన విషయాన్ని గుర్తు చేశారు. గత ప్రభుత్వ పాలనతో తమ ప్రభుత్వ పాలనను పోల్చుతూ, “వారిది కుటుంబ న్యాయం అయితే, మాది సామాజిక న్యాయం” అని వ్యాఖ్యానించారు.

ప్రజలకు అందుబాటులో లేని పాలనకు ముగింపు పలికామని, ప్రగతి భవన్, సచివాలయాలను ప్రజలకు అందుబాటులోకి తీసుకొచ్చామని చెప్పారు. కవి అందెశ్రీ పాటకు స్వేచ్ఛ కల్పించామని, ప్రజాగాయకుడు గద్దర్ పేరును శాశ్వతంగా నిలిపామని పేర్కొన్నారు.

పేదల కోసం ఇందిరమ్మ ఇళ్లు

గ్రామగ్రామాన ఏడు లక్షల ఇందిరమ్మ ఇళ్ల నిర్మాణం చేపడుతున్నామని సీఎం తెలిపారు. గత పదేళ్లలో పేదల గృహ నిర్మాణంపై తగిన దృష్టి పెట్టలేదని ఆరోపించారు. ప్రభుత్వ దిశ సరిగ్గా ఉంటేనే ప్రజల భవిష్యత్తు మెరుగవుతుందని అన్నారు.

ప్రజలు ఆలోచించి నిర్ణయం తీసుకోవాలని, ఈ ప్రభుత్వం అందరిదనే భావనతో ముందుకు సాగాలని పిలుపునిచ్చారు. ప్రజా సమస్యలు, విభేదాలు ఏవైనా ఉంటే చర్చల ద్వారా పరిష్కరించుకుని తెలంగాణ అభివృద్ధి కోసం కలిసి పనిచేద్దామని సీఎం రేవంత్ రెడ్డి అన్నారు.