అంతర్జాతీయ హ్యాకథాన్‌లో కిట్స్ వరంగల్ విద్యార్థికి గ్రాండ్ ప్రైజ్

టెస్ట్‌స్ప్రైట్ పోటీలో 1,500 డాలర్ల నగదు బహుమతి
వరంగల్‌లోని కాకతీయ ఇన్‌స్టిట్యూట్ ఆఫ్ టెక్నాలజీ అండ్ సైన్స్ (కిట్స్) విద్యార్థి అంతర్జాతీయ హ్యాకథాన్‌లో గ్రాండ్ ప్రైజ్ సాధించాడు.
పావుశెట్టి యశ్వంత్ కృష్ణ మార్చి 2026లో నిర్వహించిన “టెస్ట్‌స్ప్రైట్” హ్యాకథాన్‌లో మొదటి స్థానాన్ని సాధించి 1,500 అమెరికన్ డాలర్లు (సుమారు రూ.1.4 లక్షలు) నగదు బహుమతిని పొందాడు. ఈ పోటీలో భారతదేశం నుంచి ఎంపికైన ఏకైక విద్యార్థి యశ్వంత్ కృష్ణ అని కిట్స్ ఛైర్మన్ కెప్టెన్ వి. లక్ష్మీకాంతరావు తెలిపారు.
ఈ సందర్భంగా సంస్థ ప్రతినిధులు ఆయనను అభినందించారు.
కిట్స్ అదనపు కార్యదర్శి, హుస్నాబాద్ మాజీ ఎమ్మెల్యే వి. సతీష్ కుమార్ మాట్లాడుతూ యశ్వంత్ కృష్ణ అంతర్జాతీయ స్థాయిలో పలు విజయాలు సాధించినట్లు తెలిపారు.
జనవరి 2025లో జరిగిన హైపర్‌మోడ్ నాలెడ్జ్ గ్రాఫ్ AI ఛాలెంజ్‌లో 533 మంది పాల్గొనగా మొదటి బహుమతి సాధించాడు. ఫిబ్రవరి 2025లో IBM నిర్వహించిన హ్యాకథాన్‌లో సుమారు 1,900 మంది పాల్గొనగా యశ్వంత్ మొదటి స్థానం పొందాడు.
జూన్ 2025లో అతని “ఇమేజ్‌క్రాఫ్టర్ AI” ప్రాజెక్ట్‌కు అడోబ్ సంస్థ నిధులు మంజూరు చేసింది. నవంబర్ 2025లో ఓపస్ సంస్థ నిర్వహించిన AI జెనెసిస్ హ్యాకథాన్‌లో సుమారు 5,000 మంది పాల్గొనగా మూడో బహుమతి పొందాడు.
జనవరి 2026లో వెబ్3 హ్యాకథాన్‌లో సుమారు 2,000 మంది పాల్గొనగా యశ్వంత్ మరోసారి మొదటి బహుమతి సాధించాడు. మార్చి 2026లో “కంటెంట్ హబ్” ప్రాజెక్ట్‌కు కూడా అడోబ్ సంస్థ నుంచి నిధులు లభించాయి.
ఈ సందర్భంగా కిట్స్ ఛైర్మన్ కెప్టెన్ లక్ష్మీకాంతరావు, కోశాధికారి పి. నారాయణరెడ్డి, అదనపు కార్యదర్శి వి. సతీష్ కుమార్, ప్రిన్సిపాల్ ప్రొఫెసర్ కె. అశోక రెడ్డి అభినందనలు తెలిపారు.
ప్రిన్సిపాల్ అశోక రెడ్డి మాట్లాడుతూ విద్యార్థి సాధన సంస్థకు గర్వకారణమని, ఇది విద్యార్థి కృషి మరియు సంస్థ మద్దతును ప్రతిబింబిస్తుందని తెలిపారు.
ఉపాధ్యాయులు, విభాగాధిపతులు, రిజిస్ట్రార్, డీన్లు మరియు యశ్వంత్ తల్లిదండ్రులు కూడా అభినందనలు తెలిపారు.