దుబాయ్‌లో ప్రపంచంలోనే అత్యంత పొడవైన బంగారు నడక మార్గం
దుబాయ్: దుబాయ్‌లోని గోల్డ్ డిస్ట్రిక్ట్‌లో 24 క్యారెట్ల బంగారంతో ప్రపంచంలోనే అత్యంత పొడవైన నడక మార్గాన్ని ఏర్పాటు చేయనున్నారు. ఈ ఏడాది చివరిలోగా, మరో రెండు నెలల్లో దీనిని ప్రారంభించేందుకు ప్రణాళికలు సిద్ధం చేస్తున్నారు. ఈ మార్గం పర్యాటకులను ఆకర్షించే కొత్త కేంద్రంగా మారుతుందని అధికారులు భావిస్తున్నారు.
దుబాయ్ గోల్డ్ డిస్ట్రిక్ట్ వాణిజ్య విభాగం సీనియర్ డైరెక్టర్ రషీద్ అల్ హర్మౌది ఈ వివరాలను వెల్లడించారు. రెండు గిన్నిస్ వరల్డ్ రికార్డులు సాధించిన బంగారు జుమ్కాల ప్రకటన కార్యక్రమం సందర్భంగా ఆయన ఈ ప్రాజెక్టు గురించి మాట్లాడారు.
ఈ నడక మార్గం ద్వారా సందర్శకులు బంగారు దారిపై నడిచే అనుభూతిని పొందుతారని అల్ హర్మౌది తెలిపారు. దుబాయ్‌ను అంతర్జాతీయ పర్యాటక కేంద్రంగా, బంగారం వ్యాపారానికి ప్రధాన కేంద్రంగా మరింత అభివృద్ధి చేయడంలో భాగంగా ఈ ప్రాజెక్టును చేపడుతున్నట్లు చెప్పారు.
ఇదే సమయంలో, సంప్రదాయ భారతీయ డిజైన్‌లో తయారు చేసిన బంగారు జుమ్కాలు రెండు గిన్నిస్ ప్రపంచ రికార్డులను సాధించాయి. “సహస్ర మైల్” అనే పేరుతో రూపొందించిన ఈ జుమ్కాలకు నెమలి ఆకారం స్ఫూర్తి. భారతీయ సంస్కృతిలో నెమలికి ప్రత్యేక గుర్తింపు ఉంది.
22 క్యారెట్ల బంగారంతో తయారు చేసిన ఈ జుమ్కాల నికర బరువు 16.514 కిలోగ్రాములు. ప్రపంచంలోనే అత్యంత బరువైన బంగారు చెవిపోగుల జతగా, అతిపెద్ద చెవిపోగుల జతగా గిన్నిస్ వరల్డ్ రికార్డ్స్ వీటిని గుర్తించింది. గతంలో ఉన్న రికార్డుతో పోలిస్తే వీటి బరువు ఐదు రెట్లకు పైగా ఉంది.
జోయాలుక్కాస్ సంస్థకు చెందిన నైపుణ్యం కలిగిన కళాకారులు అనేక నెలల పాటు చేతితో ఈ జుమ్కాలను తయారు చేశారు. జోయాలుక్కాస్ గ్రూప్ ఛైర్మన్ జాయ్ అలుక్కాస్ మాట్లాడుతూ, ఈ రెండు రికార్డులను గిన్నిస్ వరల్డ్ రికార్డ్స్ అధికారికంగా గుర్తించిందని తెలిపారు.
ఈ జుమ్కాలను విక్రయించబోమని, కళాఖండాలుగా భద్రపరిచి దుబాయ్‌లో శాశ్వతంగా ప్రదర్శనకు ఉంచుతామని సంస్థ వెల్లడించింది.
ఇదిలా ఉండగా, మధ్యప్రాచ్యంలోనే అతిపెద్ద బంగారం, ఆభరణాల వాణిజ్య ప్రదర్శనను నిర్వహించే దిశగా దుబాయ్ గోల్డ్ డిస్ట్రిక్ట్ ప్రణాళికలు రూపొందిస్తోంది.
2026 ప్రారంభం నుంచి ఈ ప్రాంతంలో వ్యాపార కార్యకలాపాలు పెరిగాయి. హోల్‌సేల్ బంగారం వ్యాపార కార్యాలయాల సంఖ్య 20 శాతం పెరిగింది. బంగారం, ఆభరణాలు, విలువైన రాళ్లు, లగ్జరీ వాచీల విక్రయానికి సంబంధించిన కొత్త దుకాణాల సంఖ్య 15 శాతం పెరిగినట్లు అధికారులు వెల్లడించారు.