స్పెషల్ గ్రేడ్ డిప్యూటీ కల్లెక్టర్లు, డిప్యూటీ కల్లెక్టర్లతో రెవెన్యూ శాఖ మంత్రి పొంగులేటి శ్రీనివాస్ రెడ్డి

 

*• పదేళ్ళ ప్రజల కష్టాలు బాధలకు ముగింపు పలికేలా* 

*దేశానికి రోల్ మోడల్ గా తెలంగాణ కొత్త రెవెన్యూ చట్టం* 

*• యాచారం, తిరుమలగిరి మండలాలలో ప్రయోగాత్మకంగా అమలు* 

*• కొత్త చట్టానికి ముందే గ్రామాల్లో రెవెన్యూ యంత్రాంగం పునరుద్ధరణ*

*• ప్రభుత్వానికి కళ్ళు, చెవులు రెవెన్యూ అధికారులే*

*• ప్రజల విశ్వాసాన్ని నిలబెట్టుకునేలా రెవెన్యూ వ్యవస్థ ప్రక్షాళన*

*• ప్రతి అడుగు ప్రతి పని రెవెన్యూ వ్యవస్థకు వన్నె తెచ్చేలా ఉండాలి.*

*• రెవెన్యూ ఉద్యోగుల  జాబ్ చార్టుకు కమిటీ*

*• 33 జిల్లాలకు సెలక్షన్ గ్రేడ్ డిప్యూటీ కల్లెక్టర్లు*

*• 17 మంది రెవెన్యూ అధికారులకు ఐఏఎస్ హోదా*

*• దసరాలోపే ఎన్నికల బదిలీల తహసిల్దార్లపై నిర్ణయం*

*• స్పెషల్ గ్రేడ్ డిప్యూటీ కల్లెక్టర్లు, డిప్యూటీ కల్లెక్టర్లతో రెవెన్యూ శాఖ మంత్రి శ్రీ పొంగులేటి శ్రీనివాస్ రెడ్డి ముఖాముఖి సమావేశం*

**  *  **

*హైదరాబాద్, 6 అక్టోబర్, 2024:* రాష్ట్రంలో గత పది సంవత్సరాల నుంచి ముఖ్యంగా ధరణి పోర్టల్, ఆర్వోఆర్ చట్టం - 2020 ద్వారా ప్రజలు పడుతున్న కష్టాలు, బాధల నుంచి విముక్తి కల్పించేలా  దేశానికి రోల్ మోడల్ గా ఉండేలా త్వరలో కొత్త రెవెన్యూ చట్టం-2024ను తీసుకురాబోతున్నామని రాష్ట్ర రెవెన్యూ, సమాచార పౌరసంబంధాలు, గృహ నిర్మాణ శాఖల మంత్రి పొంగులేటి శ్రీనివాస్ రెడ్డి ప్రకటించారు. గత ప్రభుత్వం  అమలు చేసిన ధరణితో సామాన్య ప్రజలు, రైతులు ఇబ్బందులు అభద్రతాభావానికి గురయ్యారని, వారు ఎదుర్కొన్న రెవెన్యూ సమస్యలనుంచి విముక్తి కల్పిస్తామని ఇందుకోసం తమ ప్రభుత్వం చిత్తశుద్ధితో కృషి చేస్తుందని అన్నారు.

రాష్ట్రంలోని 272 మంది స్పెషల్ గ్రేడ్ డిప్యూటీ కల్లెక్టర్లు, డిప్యూటీ కల్లెక్టర్లతో మంత్రిగారు ఆదివారం నాడు ఎంసిఆర్ హెచ్ఆర్డిలో ముఖాముఖి సమావేశం నిర్వహించారు. ఈ సందర్భంగా మంత్రిగారు మాట్లాడుతూ "ఏ ప్రజలైతే కాంగ్రెస్ పార్టీ విధానాలను విశ్వసించి అధికారం అప్పగించారో ఆ ప్రజల విశ్వాసాన్ని నిలబెట్టుకోనేవిధంగా రెవెన్యూ వ్యవస్థను పూర్తిగా ప్రక్షాళన చేసి సామాన్యునికి అందుబాటులో ఉండేలా రెవెన్యూ సేవలను తీసుకురాబోతున్నాం. ప్రతి రెవెన్యూ గ్రామానికి ఒక రెవెన్యూ అధికారిని నియమిస్తాం. కొత్త రెవెన్యూ చట్టం రాకముందే దీనిపై తుది నిర్ణయం తీసుకుంటాం. గత ప్రభుత్వం తొందరపాటు నిర్ణయాలతో రెవెన్యూ వ్యవస్థను బ్రష్టు పట్టించింది. సామాన్యులకు రెవెన్యూ సేవలను దూరం చేసింది. ఇటువంటి పరిస్థితి పునరావృతం కాకుండా మా ప్రభుత్వం ఉద్యోగులను, మేధావులను, ఇలా అందరినీ సంప్రదించి వారి సూచనలను, సలహాలను స్వీకరించింది. నల్గొండ జిల్లా తిరుమలగిరి, రంగారెడ్డి జిల్లా  యాచారం మండలాలలో పైలట్ ప్రాజెక్ట్ ను నిర్వహిస్తున్నాం. అక్కడ ఎదురయ్యే సమస్యలు మంచి చెడులను పరిగణనలోకి తీసుకుని చట్టాన్ని రూపొందిస్తున్నాం. ఈ చట్టం కూడా తుది దశకు చేరుకుంది. 2020 రెవెన్యూ చట్టంలో ప్రజలకు మేలు చేసే ఏమైనా మంచి అంశాలు ఉంటే, ఎలాంటి భేషజాలకు పోకుండా కొత్త చట్టంలో పొందుపరుస్తాం.

నిన్నటి రోజు స్వయంగా నేను తిరుమలగిరి మండలంలో పర్యటించి రైతులతో మాట్లాడడం జరిగింది. ఈ  ఒక్క మండలంలోనే 4,380 ఎకరాలలో సర్వే నిర్వహిస్తే 1300 ఎకరాలు మోఖా మీద లేని వారికి పాసుబుక్కులు ఉన్నాయనే విషయం బహిర్గతమయింది.

ప్రభుత్వ భూముల పరిరక్షణలో ఏ మాత్రం రాజీ పడొద్దని ఈ భూముల పరిరక్షణ కోసం ఇక్కడికి వచ్చిన అధికారుల సూచన మేరకు ప్రతి మూడు నెలలకోసారి రాష్ట్ర స్థాయిలో, జిల్లా స్థాయిలో  కోర్టుకు సంబంధించిన భూముల విషయంలో లీగల్ టీమ్ తో సమావేశం నిర్వహిస్తాం. రాష్ట్ర స్థాయిలో జరిగే సమావేశంలో స్వయంగా నేను కూడా పాల్గొంటాను. ఏ ప్రభుత్వం అధికారంలో ఉన్నా, ఎవరూ రెవెన్యూ శాఖ మంత్రిగా ఉన్నా, ఎవరూ కూడా ప్రభుత్వ భూముల రికార్డులను టాంపరింగ్ చేయకుండా ఉండేలా యుద్ధ ప్రతిపాదికన  రెవెన్యూ రికార్డులను డిజిటలైజేషన్ చేపడుతాం.

కొత్తగా ఉద్యోగంలో చేరిన వారితో పాటు, సర్వీస్ లో ఉన్న ప్రతి ఒక్కరికీ శిక్షణ తప్పనిసరిగా చేస్తాం. రెవెన్యూ విభాగం ఉద్యోగులకు సంబంధించి జాబ్ చార్ట్ రూపొందించాలని, ఇందుకోసం ఒక కమిటీని ఏర్పాటు చేసి ఇతర రాష్ట్రాలలో అధ్యయనం చేయాలి. ఈ ప్రభుత్వానికి కండ్లు, చెవులు మీరే. మీరు బాగా పనిచేస్తేనే ప్రజలకు మేలు కలగడంతో పాటు ప్రభుత్వానికి మంచి పేరు వస్తుంది.

గత పది సంవత్సరాల నుంచి అనుభవిస్తున్న గోసను చెప్పుకోడానికి రెవెన్యూ కార్యాలయాలకు వచ్చే సామాన్యులను అక్కున చేర్చుకోవాలి, వారితో ఫ్రెండ్లీగా వ్యవహరించాలి.  గతానికి ప్రస్తుతానికి తేడా కనబడాలి. వచ్చిన ప్రతి మనిషిని గౌరవించాలి. వ్యవస్థలో ఒకరిద్దరు తప్పు చేయడం వల్ల అందరికి చెడ్డ పేరు వస్తుంది. జాగ్రత్తగా పని చేయండి. ప్రజలకు సేవ చేసే విషయంలో మీ రోల్ ప్రధానమైంది. మీరు వేసే ప్రతి అడుగు ప్రతి పని రెవెన్యూ వ్యవస్థకు వన్నె తెచ్చేలా ఉండాలి.

ఇటీవల కురిసిన భారీ వర్షాలు, వరదలకు వీలైనంత ప్రాణ నష్టం ఆస్తి నష్టం జరగకుండా రెవెన్యూ యంత్రాంగం చాలా బాగా పని చేసింది. రాష్ట్ర క్యాబినెట్ మీ అందరినీ అభినందించింది. ఇది నాకు చాలా సంతోషంగా ఉంది.

ఉద్యోగుల సమస్యలకు సంబంధించి ఆర్థికేతర అంశాలను తక్షణమే పరిష్కరిస్తామని హామీ ఇస్తున్నాను. ఆర్ధిక పరమైన అంశాలలో కొంత ఆలోచన చేస్తాం కానీ ఉద్యోగుల పదోన్నతులు వంటి అంశాలను తక్షణమే పరిష్కరిస్తాం. 33 జిల్లాలలో సెలక్షన్ గ్రేడ్ డిప్యూటీ కలెక్టర్ పోస్టులను క్రియేట్ చేస్తాం.  అలాగే 17 మంది రెవెన్యూ అధికారులకు ఐఏఎస్ హోదా కల్పించడానికి చర్యలు తీసుకుంటాం. ఎన్నికల సమయంలో బదిలీ అయిన తహసిల్దార్లను పూర్వ స్థానాలకు బదిలీ చేయడానికి దసరాలోపే నిర్ణయం తీసుకుంటాం. ఉద్యోగులు చెప్పినట్టుగా యునిఫార్మ్ గా అందరికీ ఒకే రకమైన వాహనాలు ఉండాలన్న ఆలోచన చాలా మంచిదే, కానీ రాష్ట్ర ఆర్ధిక పరిస్థితిని అర్థం చేసుకోండి. సరైన సమయంలో దీనిపై నిర్ణయం ఖచ్చితంగా తీసుకుంటాం. వాహనాల అద్దెలకు సంబంధించి ఈ నెల చివరి వరకు 50% క్లియర్ చేస్తాం.  గత ప్రభుత్వం మండలాలు, రెవెన్యూ డివిజన్లు, జిల్లాలను పెంచింది కానీ అక్కడ మౌళిక సదుపాయాలను విస్మరించింది. దాదాపు 200 మండలాలకు సొంత భవనాలు లేవు. గత ప్రభుత్వం మాదిరిగా ఆర్భాటాలకు, హెచ్చులకు పోవద్దు. అప్పులు చేసి ఉన్న బిల్డింగ్ లను కూలగొట్టి సెక్రటేరియట్ ను నిర్మించడం అవసరమా ? కొన్ని జిల్లాల్లో కలెక్టర్ కార్యాలయాలు ఉన్నా కూడా కొత్తవి నిర్మించారు. లేని దగ్గర కట్టడం అవసరమే, కానీ  ఉన్నవాటిని కూల్చి కట్టడం అవసరమా ? ప్రజా ధనాన్ని ధుర్వినియోగం చేయడం కాదా ? నేనైతే  ఇటువంటి పనులు చేయను” అని అన్నారు.

రెవిన్యూ శాఖ ప్రభుత్వ ముఖ్య కార్యదర్శి నవీన్ మిట్టల్ మాట్లాడుతూ గత తొమ్మిది నెలలలో రెవెన్యూ శాఖ మంత్రి ఆధ్వర్యంలో ప్రజలకు అనువైన విధంగా రెవెన్యూ సంస్కరణలు చేపట్టాం. దాదాపు 3.50 లక్షల ధరణి ధరఖాస్తులను పరిష్కరించడం జరిగిందన్నారు. ఈ సమావేశంలో హైదరాబాద్ జిల్లా కలెక్టర్ శ్రీ అనుదీప్ దురుశెట్టి, తెలంగాణ స్టేట్ సివిల్ సర్వీసెస్ (ఎక్స్.బ్రా.) డిప్యూటీ కల్లెక్టర్స్ అసోసియేషన్ ప్రెసిడెంట్ కే. చంద్రమోహన్, ప్రధాన కార్యదర్శి డి.శ్రీనివాస్ రెడ్డి, కోశాధికారి ఏ. భాస్కర రావు, డిప్యూటీ కల్లెక్టర్స్ అసోసియేషన్ అధ్యక్షులు వి. లచ్చి రెడ్డి, ప్రధాన కార్యదర్శి రామకృష్ణ, ట్రెసా అధ్యక్షులు వంగ రవీందర్ రెడ్డి, ప్రధాన కార్యదర్శి గౌతమ్ కుమార్ తదితరులు పాల్గొన్నారు. 

సుదీర్ఘంగా జరిగిన ఈ సమావేశంలో దాదాపు మూడు గంటలపాటు వివిధ జిల్లాలనుంచి వచ్చిన డిప్యూటీ కల్లెక్టర్లు, స్పెషల్ గ్రేడ్ డిప్యూటీ కల్లెక్టర్లు, గత ప్రభుత్వంలో ఎదురైనా సమస్యలు ముఖ్యంగా ధరణి వల్ల ప్రజలు ఎదురుకుంటున్న సమస్యలు, 2020 రెవెన్యూ చట్టం తర్వాత రెవెన్యూ వ్యవస్థ నిర్వీర్యం అయిందని గ్రామానికి రెవెన్యూ వ్యవస్థను పర్యవేక్షించే సిబ్బంది లేకుండా పోయారని మండలాలలో తహసిల్దార్ కార్యాలయాలు స్మశానాలు తలపించే విధంగా ఉన్నాయని గత నాలుగైదు సంవత్సరాలనుంచి    ఎదురైన సమస్యలు ఈ సందర్భంగా వారు ప్రస్తావించారు.