*_ఆవేశమే సన్నివేశం!_*
************************
సామాన్యుడే
నా దేవుడన్నాడు
ఆ సామాన్యుడి కోసమే బతికిండు..
తాను అసమాన్యుడైనా గాని సామాన్యుడిగానే పోయిండు..
*_కాళోజీ.._*
ఈ పేరే
తిరుగుబాటుకు నిర్వచనం..
ఆవేశానికి బహువచనం..
అక్షరంలోనైనా..
ఆహార్యంలోనైనా!
ఈ తెలంగాణ కవికి నివాళి
ఆ తెలంగాణ యాసలోనే
ఆ భాషలోనే రాద్దామనుకుంటే
అంతలోనే ఆయన మాటలే గుర్తుకొచ్చి మూసుకొని తెలిసిన పథంలోనే
పద పదంటూ
పరుగులెత్తింది ప్రతి పదం..
అలాగే అమరింది
ప్రతి పాదం!
ఔను మరి..
*_ఎవడి వాడుక భాషలో_*
*_వాడే రాయాలె.._*
*_ఇట్ట రాస్తే అవతలోడికి తెలుస్తదా..!_*
అని ముందే హెచ్చరించాడు పెద్దాయన..
ఇక ప్రయోగాల జోలికెళ్ళి
ఏం ప్రయోజనం..!?
*_ఒక్క సిరాచుక్క_*
*_లక్ష మెదళ్ళకు కదలిక.._*
మళ్లీ ఆ పెద్దాయన
మాటలే స్ఫూర్తిగా
ఆయన కాలాన్ని తలస్తూ
కలం కదిలింది..
ఆయన గురించి నాలుగు మాటలు రాద్దామంటే
మస్తిష్కం నిండా
ఆయన మాటలే
సుడులు తిరుగుతున్నాయి...
అలవాటు ప్రకారం
మద్దెలో నాలుగు
ఎంగిలిపీసు ముక్కలు జొప్పసిస్తనేమోమని
మా చెడ్డ భయం..
*_తెలుగు బిడ్డవురోరి_*
*_తెలుగు మాట్లాడుటకు_*
*_సంకోచపడెదవు_*
*_సంగతేమిటిరా.._*
*_అన్యభాషలు నేర్చి_*
*_ఆంధ్రంబు రాదనుచు_*
*_సకిలించు ఆంధ్రుడా_*
*_చావవేటికిరా.._*
ఇలా గద్దించిన కాళోజీ
మాటలు బుద్దెరిగి మసలితే
*_తెలుగోడు ఎప్పటికీ వెలుగోడే!_*
*కాళోజీ..ఉద్యమ ప్రతిధ్వని..*
*రాజకీయ సామాజిక*
*చైతన్య సమాహారం..*
_*ఆయన ఓ ప్రశ్న..*_
*_ఆయనే జవాబు.._*
*_హక్కు ఆయన బుక్కు.._*
*_అదే ఆయన ధృక్కు.._*
*_ఇది నా గొడవ_* ని
అనుకోక
*తుది విజయం మనది* అంటూ
ఆ హక్కు కోసం
మొదట తెల్లదొరలను..
పిదప నిజాములను
ఎదిరించిన శూరుడు..
*_మండే సూర్యుడు!_*
"""""""""""""""""""""""""""""""""""
ప్రజాకవి..పద్మవిభూషణ్
కాళోజీ నారాయణ రావు జయంతి
(09.09.1914)
సందర్భంగా
ప్రణామాలతో..
*_ఎలిశెట్టి సురేష్ కుమార్_*
9948546286
0 కామెంట్లు
Please Do not enter any spam link in the comment box